Tregut të punës i shtohen 17.7 mijë pensionistë, largohen 14.4 mijë të rinj deri në 29 vjeç

Tregu i punës humbi mijëra të rinj, ndërsa numri i pensionistëve të punësuar u rrit ndjeshëm.

Tregu shqiptar i punës po përballet me një ndryshim të fortë demografik, teksa numri i të punësuarve në moshë aktive po bie, ndërsa pjesëmarrja e pensionistëve në ekonomi po rritet. Sipas të dhënave të INSTAT për tremujorin e parë të vitit 2026, numri i të punësuarve në popullsinë në moshë pune ra me 32,736 persona krahasuar me të njëjtën periudhë të një viti më parë. Rënia më e fortë është regjistruar te grupmosha 15–29 vjeç, ku numri i të punësuarve u tkurr me rreth 14.4 mijë persona ose 8% në terma vjetorë.

Edhe grupmosha 30–64 vjeç, e konsideruar si baza kryesore e tregut të punës, shënoi rënie me më shumë se 18 mijë të punësuar, ose 2.1% më pak krahasuar me një vit më parë. Këto dy kategori përbëjnë pjesën më të madhe të forcës punëtore dhe tkurrja e tyre sinjalizon dobësim të potencialit ekonomik të vendit.

Pensionistët rrisin praninë në tregun e punës

Në kontrast me rënien e të punësuarve në moshë aktive, grupmosha mbi 64 vjeç ka shënuar rritje të fortë. Numri i të punësuarve në këtë kategori arriti në 140,713 persona në tremujorin e parë të vitit 2026, me një shtesë prej rreth 17.7 mijë personash ose 14.4% krahasuar me të njëjtën periudhë të vitit të kaluar.

Si rezultat, pensionistët e punësuar përbënin 12.2% të totalit të të punësuarve në vend, nga 10.5% që ishte kjo peshë në tremujorin e parë të vitit 2025. Kjo tregon se roli i të moshuarve në mbështetjen e aktivitetit ekonomik po bëhet gjithnjë e më i rëndësishëm.

Emigracioni dhe plakja e popullsisë ndikojnë tregun

Rritja e punësimit te pensionistët lidhet me një kombinim faktorësh, ku përfshihen emigracioni i të rinjve, plakja e popullsisë dhe nevoja ekonomike për të vazhduar aktivitetin edhe pas daljes në pension. Ndërsa vendi humbet punonjës në moshë aktive, bizneset dhe ekonomia po mbështeten gjithnjë e më shumë te grupmoshat më të vjetra për të plotësuar nevojat e tregut të punës.

Nëse kjo prirje vazhdon, tregu i punës mund të përballet me mungesë të fuqisë punëtore në vitet e ardhshme, ndërsa barra për mbajtjen e aktivitetit ekonomik do të zhvendoset gradualisht drejt pensionistëve.

Rreziku për potencialin ekonomik

Rënia e të punësuarve në moshë pune sinjalizon tkurrje të bazës prodhuese të ekonomisë. Të rinjtë dhe grupmoshat aktive zakonisht mbajnë peshën kryesore të rritjes ekonomike, pasi janë më të prirur të përfshihen në sektorë të rinj, të adoptojnë teknologji dhe të krijojnë vlerë të shtuar. Zvogëlimi i kësaj force pune mund të ndikojë drejtpërdrejt në ritmin e zhvillimit ekonomik.

Nga ana tjetër, rritja e punësimit te pensionistët nuk reflekton domosdoshmërisht një zgjerim cilësor të tregut të punës, por më tepër një përshtatje ndaj mungesës së punonjësve. Shumë të moshuar vazhdojnë të punojnë për arsye ekonomike dhe shpesh angazhohen në aktivitete tradicionale ose me produktivitet më të ulët. Kjo mund të ndikojë në strukturën e ekonomisë, duke rritur peshën e sektorëve me potencial më të kufizuar për zhvillim.

Në një periudhë kur ekonomia ka nevojë për më shumë inovacion, energji dhe përshtatje me transformimin digjital, mbështetja në një forcë pune gjithnjë e më të moshuar mund të kufizojë potencialin e saj. Nëse tendenca aktuale vijon, sfida nuk do të jetë vetëm mungesa e punonjësve, por edhe funksionimi i ekonomisë nën kapacitetet që ajo mund të arrijë.

Burimi: Monitor

Më të lexuarat